ZomiSDA: Lampialna, Langpanna leh Pawlpi pan Pusuahkhiatzia ettelna

I. Thupatna: Ei ZomiSDA te in “Conference” ki-ukna a deih uh pen SDA pawlpi pan pusuah nopna hi lo hi. Leitung gam khangtote a tamzaw-a Adventist pawlpite in hih ki-ukna zang uh hi. Thu hoih mahmah khat zong ahi hi. SDA upna thuguipite pan lampialna zong hi pahsam lo hi. Lampi maan tawh Conference ngah dinga na hanciam laitengin SDA pawlpi mihoih khat na hi lai hi.

Ahi zongin lampimaan tawh conference ngah dingin na kalsuan kei-a, pawlpi’ thukhunte leh ki-ukna thuguite tawh kituak lo in na sep tak ciangin SDA pawlpi a langdo, thunial na hi ta hi. Tua banga na om tak ciangin ih galpa in Pasian’ tate hihna pan hong singkhia khia ahih lam ei leh ei ih kithei nawn kei a, lampial i-hih zong a kitheilo na hi hi. Tua bangin Adventist upna pan hong kisingkhia hi.

Adventist pawlpi mi maan taktak khat-in hong uk te thu nial ngei lo hi. “A kuamah peuh in hong ukte’ thu na mang ciat un. Bang hang hiam cih leh Pasian’ thukimpih lohin kuamah in ukna thu neilo hi; ukna thu nei i cih mite pen Pasian’ koih mite ahi hi” (Rom 13:1).

A. Nitawpni-a “kisinkhiatna” thu Lai Siang Tho genkholhnate

 

1. MAC President Kai Za Dal in hih ka laihawm masa hong thuk kikna ah, LST lui pan hong pan a, thulu “[D/1/b (i) Israel mite (A beibang pawlpi kihel lo); (ii) Christian dangte (abeibangte kihel lo hi) Mang 2:17]” ci hi. Tu hun-a Laodiki pawl ahi abeibaang pawlpite kisinkhiatna ah kihel lo ding cih thu hi.

 

MAC in lampial a kisinkhiatna ah kihel hi cih ding a deihlo man hi. Pawlpi mite mit hong humsakna hi. Jesu hong hilhna leh Kamsangnu E G White hong hilhnate enkak in ngaihsun pha zaw ni!

 

2. “Tahum” leh “Taangci hoih” gentehna (Matthai 13:24-30) ih ettel ciangin:

a. “Taangci hoih” te in “a thumaan Pasian’ tate hi” (Christ’s Object Lessons, pp. 70, 71)

b. “Tahumte” in pawlpi sunga thumaanlo Khristiante hi; leitunga thu-umlote cihna hi lo hi

(COL 71) ci-in Ellen G White in na telgen mahmah hi.

 

3. Paul in zong: Jesu hong kumkik ma in “Sagilote…Note sung mahmah panin zong mi pawlkhat in thu um mite khemin a zolkhia hun hong tung ” (Sawltak 20:29, 30) ci hi. Tua Sagilote in “kisinkhiatna” or “lampialna - apostasy” om sak ding ci hi (2 Thess. 2:2, 3). Johan in zong hih bangin hong hilhkholh ta hi: “Kamsang kineihkhem tampi hong om khinta hi….(1 Johan 4:1, 3).

 

4. “Kisinkhiatna” ih cih in upna pan pialkhiatna, thunialnate hi. “Pasian kiang pan lampialna in a tawntung in om a, hun tawp dongin om lai ding hi” (Ms 135, October 31, 1902; Unlimited Love, p. 318).

 

MAC President Kai Za Dal hong dawn kikna ah: “Sunday law hong thuk ciang bekin kisinkhiat na om ding, tu hun a gennuam hi kei, mailam thu a genna hi” ci-in (18-2-2004) in gelh hi. E G White genna tawh kigamla lua hi. Hih zong “Thumaan teci” panna a nawlkhin hong suak-a, kisinkhiatna, lampialna leh Kha Siangtho’ silpiak [28 beliefs ah No. 17] na a umlo, a sanglo cihna leh Adventist upna pan lampialna ahi hi.

B. A masa Pawlpi sungah kisinkhiatna

1. Jesu in pawlpi hong phuh phet leh lampialna hong om pah hi.

a. Nungzui 12 te hong teel khia-a pawlpi hong phut hi.

b. Nungzui hong kibehlap toto hi (Sawltak 2:47).

c. Jesu in anlum 5 leh ngasa pum nih tawh mi 5000 hong vak (Matthai 14:17, 21) a,

(i) Tua thu hangin mihonte in amau deihna bangin zawhthawhthu tawh Jesu kumpi hong suah sak nuam uh hi (Johan 6:15; Desire of Ages, p. 378). Pasian’ vaihawm pen mihing’ deihna banga khel ding, pawlpi vaihawmnate mimal deihna banga khel ding cihnopna hi. Ahi zongin Jesu in 

(ii) A hun tung nailo ahih manin kihemkhia sim hi. Jesu’n mihingte geelna pompih lo cihna hi.

d. Jesu in “Ama’ sa nekna” leh “Ama’ sisan dawnna” thu sermon hong nei hi.

e. A hi zongin, mihonte in hong telkhialh uha, Khristian pawlpi sungah “lampialna” hong piang hi:

(i) Mihonte adingin Jesu’ thuhilhna in “tel hak” hi (Johan 6:60).

(ii) “Hih bang a thugenna hangin a nung a zui, a thungai mi tampi kileh kik-in Jesu hong nusia uh

hi” (v-66).

(iii) “Note zong na ciah kik nuam uh hiam” (v-67, 68) ci-a a dot ciangin, nungzui 12 in nungkiklo uh hi. Tua khit ciangin,

(iv) A thupimahmah hun hong tun ciangin Judah Iscariot in Jesu hong lehheh-a, nungzuite in zong

hong taisan uh hi (Matthai 26:65). Tua zong kisinkhiatna khat mah hi.

 

2. Pawlpi sungah lampialnate

a. Judah Iscariot: leitung lunggulhna leh Jesu muanlohna tawh lam hong pial hi.

b. Ananias leh Saphira (Sawl 5) leitung lunggulhnate aangsung ding zonna tawh lampial hi.

c. Demas in thumaan uplohna tawh lampial hi (Philemon 24; Kol. 4:4; 2 Tim. 4:10).

3. Paul in tu hun pawlpi a ding bek hi lo-in, mai hun-a pawlpi a dingin zong lungkham sak hi.

a. Nisim a nasepna ah “8” vei bang tuahsiatna ka thuak hi, ci hi (2 Kor. 11:24-26)

(i) “Ka mipihte kiang pan buaina” (v-26)

(ii) “Lampial sanggamte kiangpan buaina” (v-26)

(iii) Jesu hong kumma in “Lampialna” (2 Thess. 2:2) hong om ding hi ci-in Paul in gen hi.

 

B. A Beibaang Pawlpi sungah “kisinkhiatna” om ding ci-a Ellen G White genkholhna te:

 

1. EG White kiangah “Kidona Lianpi” thu mangmuhna a piak hun (March 14, 1858) kumin hunbei-ma in SDA pawlpi (A beibaang pawlpi) sungah “kisinkhiatna” om ding hi ci-in Pasian in na hilhkholh hi. (Early Writings, pp. 269-273, Spiritual Gifts, vol. 1, pp. 83-88) Sia Kai Za Dal in (A beibaang pawlpi) kihel lo a cih leh Sunday law hong omh ciang hi pan ding hi, acih pen Thumaanteci panna (Mang 19:10) uplohna leh nialna ahi hi.

 

2. Tua “kisinkhiatna” pen ama hun-a SDA pawlpi pan hehpihna Kong kikhak dongin hong kizom ding hi, ci-in EG White in gen hi.

II. Kisinkhiatna nunung pen te ettel kikna

A. Kisinkhiatna kipan: SDA pawlpi hong dinkhiat a kipan-in lampialna hong om pah lian hi

1. “Messenger Party” SDA pawlpi min kivawkma, pawlpi kiphuhma pek (1853-54) kum in SDA upna pan a lampial pawlte hi. H S Case, C P Russell, leh D P Hall te in Ellen White langpan uh hi(10 Bible Commentary, p. 870-871).

 

2. “Marion Party” 1860 kum in Iowa Conference president leh treasurer ahi B F Snook leh W H

Brinkerhoff te makaihna tawh a pusuahkhia pawl hi. Hih pawlte in Church of God (Seventh-day)

pawlpi hong phuankhia hi (10 BC 853-854)

 

3. “Owen R L Crosier” 1858 kum in pawlpi pan pusuah in Advent Christian Church pawlpi ah siapi

sem hi (10 BC 359).

 

4. “Moses Hull” 1857 kumin SDA hong suak a, thuhilhsia kipia pah hi. 1863 kum ciangin a nasep pan khawl in Sikhahopih pawl hong suak hi (10 BC 606-07).

 

5. “Dudley M Canright” (1840-1919), thugensiam, laigelhsiampa hi-a kum 28 sung pawlpi nasem ahih khit, 1887 kum ciangn SDA pawlpi nusia a pawlpi langpanna laibu bu 2 zong gelh hi.

 

6. Albion Fox Ballenger (1861-1921), pawlpi makaipi khat hi a, The Gathering Call pawlpi hong phuan khia hi (10 BC 121).

 

7. John Harvey Kellogg, Zato siavuanpi hi-a, Pantheism –na khempeuh sungah Pasian om cih upna

tawh lampialpa hi. SDA pawlpi pan a min kiphiat hi (10 BC 722-26).

 

8. A T Jones leh E J Waggoner te in Upna tawh dikna kingah cih upna hong mukhia uh a, ahi zongin

pawlpi pan lam hong pial khia uh hi.

 

9. Franklin E Belden (1858-1945), Ellen G White ii a ngangpi hi a, laphuak siam mahmah hi. 1888

kum General Conference khoppi sungah E G White hong tangnial hi (10 BC 142).

 

10. Sia Kai Za Dal in SDA pawlpi sungpan lampialna pen makaite kiang pan hong kipan masa hi ci-in,UMM leh MYUM makaite hong gawh hi. Lampialna pen makaite kiang pan zong hong kipan thei a, pawlpimi nautang te kiang pan zong hong kipan thei hi. Ei Upper Myanmar Mission sungah “Conference” ah kalsuan dingin kipatna pen Sia Thang Siangh leh Kham Khen Pau te kiang pan hong kipan khia hi. Leitung lunggulhna lungsim tuamtuam te hangin “CONFERENCE” ki-ukna i zat loh phamawh hi cih ngaihsutna hong nei uh, tua ngaihsutna pen pawlpi mi teitang pawl khat in

hong makai in hong diangkhia uh hi. Pasian pawlpi sungah a om dinga kilawm hetlo “tutphah awn lo ding,” “makai tuam teel ding,” leh “sumpi tuamkholh ding” cih te hong om hi.

B. Kisinkhiatna masa in a nunung kisinkhiatna hong suak

 

1. Amasa lam SDA pawlpi hong din hun-a lampialna bangin, hun beima in SDA pawlpi sungah hong om kik ding hi (2 Selected Messages, pp. 37, 38).

 

2. 1980 kum-a Desmond Ford leh Walter Rea te buaina leh Dr Donald Davenport in a piankhiat sak

sum lam buaina pen mi tampi in “a nunung kisinkhiatna” hi ci uh hi.

 

3. Ei Upper Myanmar Mission sungah, 1953 kum in SDA thumaan hong tung hi.

 

a. A sawt lo-in Sia Ngul Khaw Thang makaihna tawh SDA Reform Movement kici pawl hong

pusuah khia hi.

 

b. Pa Kam Za Kim makai in pawlkhat hong pusuah “Khuavak pawlpi” hong phuan uh hi.

 

c. 1977 ciangin Kapteel khua Pa Thawn Za Cin makai in honkhat hong pusuak uh-a “Church of God” pawlpi hong din uh hi.

 

d. 2004 kum ciangin Kai Za Dal leh Kham Khen Pau makaihna tawh “conference” ki-ukna paulap in thu-um mi 1774 hong pusuah khia uh a, “Myanmar Adventist Conference” hong ci uh hi. Pawlpi

upna thuguipite (28) teng zui ung, policy khempeuh pom khin ung, ci uh a, a hi zongin SDA

pawlpi ki-ukna nialin diangkhia ahih man SDA pawlpi sung pan kihemkhia hi.

 

3. “A nunung pen kisinkhiatna” tawh kisai in Ellen G White in 1882 kumin hih bangin gelh hi:

“Mi khempeuh ih a kha dinmun a kisittel sak huihpi khat hong nung hi. Tua ahih ciangin na sehnel

dinmun nusia inla, Suangpi zong in. Thuk tawh in la, na mun kip sak in. Khitui leh thungetna tawh

lam in. (Testimonies for the Church, 129, 130)

III. A Nunung Kisinkhiatna: Kamsangnu hong hilh zia

A. Asi haihkhiatna (Letter 46, 1887),

B. A tak leh asi khenkhiatna (Selected Messages, vol. 2, p. 380),

C. Kham leh kham-ek khenkhiatna (5T 81),

D. “A nasia mahmah ze-etna” (2SM 368),

E. “A lauhuai mahmah haksatna” (2SM 380) ci-in thu tuamtuam tawh hong hilh hi.

IV. Kisinkhiatna nunung a piang sak thute

A. Pawlpua pan bawlsiatna hang

 

1. “Neih le lamh khantohna in a ki-umsak mi khang sak hi. Kigal neihna in amaute pawl pua tung kik sak hi” (4T 89). Neih leh lamh tawh kikop pawlpimite a bel dingin thu-um pawlkhat hong lut thei hi. Egypt gam pan Israel mite hong ciah kik lai-in, thu-um lo Egypt mi tampi in Israel mite kibawl zia leh Pasian’ vangliatna a muh ciangin hamphatna khat teeiteei kingah thei ding cih ngaihsutna tawh hong zui-uh a, tua te in lam tawntung buaina hong pia pia hi. Tu hun in zong tua bang mite pawlpi sungah hong om ding hi.

 

2. Gam ukte leh pawl sungah mi thupite in Sunday a siantho sak nading hanciam hi (GC 592).

 

3. Ellen G White hong genna ah: “Langpanna piang sak un. Bawlsiatna piang sak un, lungsim phel

nihneite upna pan hong pialkhia ding hi” (Great Controversy, p. 602).

 

B. SDA pawlpi sung pan a maanlo upna te

 

1. “Kisinkhiatna hong om ciangin a maanlo upna neite leh a puatham bek a umte hong kisingkhia

ding hi (Testimonies to Ministers, p. 112).

 

a. Pawlpi ki-ukna thukhun ah “sawma khat” pen khuatual pawlpi in zang ngei lo hi. Tungsiah

zumpi ah kipuak hi. Church Manual sungah siangtak in hong hilh a, makaite in lai tawh, kam

tawh in zong hong hilh hi. Ahi zongin, UMM sunga Zomisda-te pawlkhat in amau deihna

bangin zeek theih nading in hong tuamkholhna tawh Adventist upna hong nial hi. [SDA    

Church Manual, Tedim kam, 57, 129]

 

b. Pawlpi ki-ukna tawh kikim ki-ukna khat hong bawl-a, makai teelkhia in, nasem ding zong hong guai uh hi. Korah, Dathan leh Abiram te cih mah bangin makaite thu nial uh hi. A omsa ki-ukna sungah a tuam vilvel ki-ukna hong neih na tawh Adventist upna leh ki-ukna nial in lam hong pial uh hi. Hih thute (Sangchia laihawm ah kisim thei hi). [GC Working Policy & SDA Church Manual, Tedim kam, 156]

c. “Myanmar Biblical Christian Fellowship tawh kizom in SDA Mission te hong bawlsiat theih loh nading in bukna mun kila hi” ci hi. MBCF in pawlpi hi lo-a, Christiante kipawlna khat bek hi

lel hi, ci uh hi (Kai Za Dal, Explanation about the Disbandment, March 9, 2006).

 

2. EG White in ama khanlai mah in vanah biakbuk om lo hi cih upna tawh nialna na tuak khin hi.

Tua thu tawh kisai in hih bangin hong hilhkholh hi:

 

a. 1905: “Mailam ah khemna tuamtuam hong om ding hi. Vantungah biakbuk om lo hi cih thu

tungah lampialna hong om kik ding hi (Review and Herald, May 25, 1905; Evangelism, p. 224).

 

b. 1906: “Eima sung panin zuau kamsangte hong khang dinga, amaanlo upnate hong hilh ding hi” (Evangelism, p. 224).

 

c. 1907: “A maanlo upna te piangkhia sak dingin mi pawl khat in hong makai ding hi (Ev. 224).

 

3. EG White in Kellogg’ upna pen “lampialna A” ci-a, mailam-ah “Z” hong piang ding hi ci hi.

Mailam SDA pawlpi sunga “amau leh amau thei akisa, ahi zongin Pasian tawh a kizom lo makaite in a maanlo thute hong hilh ding hi” ci hi. (2SM 193-208).

a. “A puk vantungmi te in hong khem a…amau galhiamte nusia in, hong khemthei kha te nung zui

ding uh hi. Pasian hong hilhna thudon lo in, Satan nungah hong om ding uh hi.”

b. “Tangthu in hong piangkik kik ding hi. Bang hong piang ding cih ka gen thei a, ahi zongin

a hun cing nai lo hi…. Eite sung mahmah panin zong pawl khat upna pan hong pial dinga,

khemna a piangsak pa tawh hong kipawl ding uh hi.”

 

4. Seventh-day Adventist leh Myanmar Adventist Conference

 

a. “Conference Planning Committee in pawlpi upna bulpite nial lo hi. Zui khin uh hi” (Kai Za Dal,18-2-2004) in ci hi. Tua bang a cih uh hangin SDA pawlpi upna thuguipite nial ahih manin, SDA pawlpi pan in kiphiatkhia hi. Sawm-a khat vai, pawlpi dang tawh kizopna vai, sspawlpi ih kipumkhatna cihte ah upna thuguipi 28 te bang leh pawlpi policy om bangin kalsuan lo uh hi.

b. “Conference” vai-a dianna pen kisinkhiatna sungah kihel nading hi thei lo hi” (Kai Za Dal, 18-2-2004) ci hi. Conference deih-a na sem ih hih leh, bang hangin pawlpi nasepnate thudon lo in se ih hi hiam? Conference hih nadingin Mission in hong makaih dinga, sawma khat te tuam kholh lo, makai tuam neih zong kul lo, min tuam tuam neih/phuah zong kul lo, pawlpi dangte neihsa phalna nambat va lak kul lo in SDA pawlpi a ding khin sa hi a, tua kep suak ding hi bek hi. Tua bang tengah pawlpi deihna bangin hong sep loh tak ciangin, pawlpi pan a lampial suak a, pawlpi dang topa in va neih na hong suak in, SDA pawlpi dinmun tawh hong kituak nawn lo hi. Din mun laihna khat a hih mah bangin, (Mang 2:4) ah “Amasa lai-a kei na hong it bangun tu-in na hong it nawn kei uh hi” ci-a Jesuh hong genna din mun ah a tung hong suak hi.

C. “Thumaan teci” langpanna

 

1. “Kisinkhiatna in Laodikih pawlpi tungah kipia “thumaan teci” hong thuhilhna hi. Pawl khat in hong sang dinga khanlawhna om ding hi. Pawl khat in hong langpang dinga, Pasian’ mite sungah kisin- khiatna hong piang sak ding hi” (1T 181; Early Writings, p. 270).

 

2. “Thumaan teci” in Jesu’ min hi (Mang 3:14). Kamsangte in thumaan teci panna hong nei hi

(Mang 19:10).

 

3. “Mihingte in Pasian’ lampi sangin amau’ thu uh hong thupi sak zaw ding uh hi; bang hang hiam cih leh amau in kipum-ap nailo uh hi. Khuavak a neih sam uh hangin hoihtakin tang zo nai lo hi (5T 719-720).

 

4. SDA pawlpi sungah langpanna

a. “SDA pawlpi sungah Satan’ khemna nunung pen in ‘lamdang taka phuahtawm nasepna –work

ingeniously, lampi tuam tawh nasepna” te hi” (1SM 48). Tua bang nasep te in hih bang nasepte ahi hi:

 

(i) “Conference pen a ngen in kituat kei un la a dingkhin in kituat lel un. Ih it mahmah Myanmar Union pen kah kawmsa in mangpha paihlel hun ta hihin ka um hi” (Thang Siangh, May 2, '07).

 

(ii) “Conference status cingtaklo Union Mission tungtawn a Conference nget ding hi thei lo hi. Union a din ngam lo nung sang Upper Myanmar Union Conference dinloh phamawh hi. Hong pia taleh ding ding, pia takeileh ding ding kul hi. GC leh Division in hong recognize mateng kingak ding hi. Jesu hong kum dong hong piak kei leh zong lungkialo in kingak ding hi” (Thang Siangh, May 26, 2007).

 

(iii) Tuu le keel a khenna mun en lecin General Conference of Seventh-day Adventist pawlpimember na suah mateng ci lo hi. GC ten lah a tuumang kanlo-in upadi bek tawh kapkap mawk, Mission officer ten lah a tuute lehhen ding leh thongsung khum ding hanciam zaw, GC, Division, Union officer bang zah peuh mah ki leh hapak tawh hong om tam,” (Thang Siangh, Nov. 21, 2007).

(iv) Hih atunga kihansuahnate et ciangin, pawlpi ki-ukna man nading kihansuahna hi lo zaw in, ei mimal deihna bangin pawlpi in hong sep sak, bawl sak mateng in, pawlpi ki-ukna mang loding, hehpihna kong kikhak dong in ngak ding cih thu hi ta hi. Naupang kum 10 khat in “Pa aw, zi nong lak sak kei zongin na nei mai ing, ci-a ama thuthu in zi hong neih leh” tua tawh kibang linlian hi. Pia ta leh ding ding, pia ta keileh zong ding ding, a ding khin sa ci-in kingaihsun ding, local conference beek hi lo in Union Conference in ding ding cih giapguap ciangin, pawlpi thu pen tengta kineih banga neih ding hih tuak hi. Tua bang zia a kalsuannate in ei thu tawh a lamdang takin phuahtawm in a hi lopi khat, hi hi ci-a dinkhiat na hong suak hi. Pawlpi dinmun pan kisinkhiatna khat mah hi. SDA pawlpi sungah hih bang thu khat vei zong om ngei nai lo hi. 

b. Satan’ a lannuai-ah om SDA te in Pasian’ Kha hong hilhkholhnate umlo in a upna uh hong nusia ding uh hi” (3SM 84). Satan’ lan ahi Myanmar Biblical Christian Fellowship te matpungten nambat [Tah Kha Phah Mah – 1617/M 152] bukna hong la in pawlpi a langpan na in KST hilhkholhna hong tangtun na taktak hi ta hi. Pawlpi min ahi-a kipawlna khat lel ih min a hi phial zongin Sunday siangtho sakte kipawlna hi himhim khin ahih mahin, (Mangmuhna 13:15) sunga “ganhing masa lim dingin a kibawl milim sungah a hu muap ciangin hong pau thei a” cih bangin, tua nambat a zat ciangin SDA pawlpi hi susia thei nawnlo, nawngkai sak thei nawnlo ding hi cihna, belhbuk hi cihna lim ahi hi. Sunday’ limh ah bukna laa cih na hi. Lampialna nasia pen hi.

Hih kanin a dang bang lampialna om nawn ding hiam? Sunday’ ngim nangawn a deih lo-a hatsatna tampi thuak in SDA ah lut khin a, tu in va bel kik cih pen lampialna lo a dang bang hi ding hiam? Ui leh vok te bek in a luahsa ne kik hi. Nang e?

c. “Thumaan teci uplah nadinga bawl ding pen Satan’ ngimna ahi hi” (4T 211). “Kisinkhiatna pen Sunday law hong tun ciangin hong piang ding thu hi pan hi…Laodikih pawlpitungah zuihding thu pawlkhat pia ahih hangin, a thudon lo ciangin hun biseh lian hong pia lo hi. Ahi zong mailam hun a ding ngimna nei hi…Conference in kuamah singkhia lo hi” (Kai Za Dal,18-2-2004) pawlpimite’ mittangin thumaan a muh nading panin hong liah sak hi. Satan’ ngimna doctrine kihilhna khat hi. Dr Desmond Ford’ lampialna sangin nasia zaw a, Dr. Kellogg’ upna pen “A” na ci a, “Z” hong pailai ding hi a cih bangmahin UMM ah hong tung tak pi hi.

Conference in kuamah singkhia lo hi a cih hangin zomisda te 1774 hong singkhia hi. Pawlpi kip 17 hong singkhia hi. Pastor, Section director leh president, Union director ciang a tung LST lamah BA, MA degree anei Tuiphum siapi nih bang hong sinkhiat sak hi. Lai thei mipil tampi hong sinkhiat sak lai hi.

V. Kisinkhiatna a nasiat zia ding Ellen White hong hilhkholhnate: “A kisingkhia thei khempeuh kisingkhia ding hi” (6T 332). Pawlpi bup in zong kisingkhia thei mai ding hi. A hi zongin Topa in phal lo hi. Pawlpi in bangzah ta in nin baangin, satonna nei ta se mah leh, ka it pen leh ka nuntakna kapiak sak pawlpi hi ci hi. Ahi zongin tua sung panin hih bang in hong pusuah ngeingai ding hi:

 

A. Pawlpi a nusiate

1. Atamna gen zia

a. “Tampi tak lampial hi” (4T 495),

b. “Singteh keu pulh bangin” (4T 89),

c. “Lompi khat” (GC 608; 2SM 368, Ev. 301),

d. “A tam zaw in hong taisan uh hi” (5T 136)

2. Bangzah huam ding

a. “Thumaan sungah a nuamsa innkuan khempeuh” (TM 411),

b. “A lompi in” Topa’ galkap panin galpa’ nungzui hong suak uh hi” (8T 41),

c. “Huih in tahum a-mutkek bangin hong lengkhia ding hi” (5T 81)

3. Pawl sungah a dinmun pan in

a. Tuiphumsiate, laihilhsiate: “Pasian in khuavak leh thupha tam a piak na hangin palsatna

leh hun nunung cianga lampialna pan hong kem zo lo hi (Unlimited Love, p. 310).

(i) “Topa in a lapsang mi pawlkhat nangawn zong Lucifer nungzui in lampial ding hi” (Ev. 360).

(ii) “Topa in panmun sangah a koih mi pawlkhat” (Unlimited Love, p. 318)

(iii) “Tuiphumsia/makaite” (3SM 385).

(iv) “Tu laitak pulpit-ah thugen pawlkhat zong thukham singkuang hong pua nawnlo ding”

(TM 409, 411)

(v) “Tu laitakin thumaan pom-a thugensiam pawlkhatte in thu-umte khem nadingin a vang uh

hong zang ding hi. A pawlpih masate adingin a kitakhuai mahmah galte hong suak ding uhhi” (GC 608).

(vi) “Aksi banga atang mahmah mi tampi in khuazing sungah hong pai ding uh hi” (Prophets and Kings, pp. 188, 387; 5T 81)

(vii) “Thuphumsia, sihni – lawyerte, sivuante in thumaanlo hong pom ding uh hi” (UL 317).

4. Kha lam thu ah a bangci te lampial hiam?

a. SDA hong suak napi thumaan laigil taktak a pom kha lote (19 MR 176)

b. “Dathan leh Abiram te langpanna bangin hong piang kik hi, hun beikuan in zong hong piangkik

ding hi” (Letter 15, 1892).

c. “Thumaan thei napi a zui lote” (6T 332)

d. “Leitungte tawh a kibang nuamte” (5T 463)

 

B. Tu laitaka SDA pawlpi omzia ding genkholhna

1. Kisinkhiat hun ciangin mi tampi pawlpi nusia dinga, ahi zongin adang dang hong lutbehbeh ding hi. a. Guah nunung sang dingin a kigingte tungah KST kibuak ding hi,

b. Khanlawhna hong om dinga, a minam a minam in hong lut dinga, a pawl a pawl in pusuak kik

ding hi (8T 41).

 

2. A pusuah leh a lut kik tawh kisai Ellen White genna

a. “Pawlkhat hong kisingkhia dinga, amau dinmun a luah dingin thakhat thu-in hong lutkik ding hi”

(EW 271).

b. “Pawlpi a puk tawh kibang kha ding hi, ahi zongin puk lo hi. Zion ah mawhneite kisingkhia ding a, tahumte in tangci hoih te tawh hong kikhenkhia ding hi” (7BC 911).

VI. Thukhupna

“Mission lampanin Conference deihte pawlpua-ah koih dingin hong hanciam uh hi. Kha Siangtho hilhkholhnate a maanlopi in hong khia uha, hong nuai-nenh hi. Upper Myanmar Conference Planning Committee in, SDA thu-upna 28 te sang hi. SDA policy tawh kipawl nuam a, angsung ading nasem makaite bek tawh kipawl nuam lo hi. Conferece hih theih nading hong khak te bek a nawk nuam hi” (Kai Za Dal, 18-2-2004) ci-in gelh hi.

“Conference” deihna bek tawh pawlpua ah kikoih thei lo hi. Church Manual leh Policy sungah tua bang thukhun om lo hi. Tua ahih leh bang hangin Conference deih-a a diangte pawlpi pua ah kikoih thei hiam? Mission makaite gitloh man hiam? ZomiSDA sungah “CONFERENCE” ci-a hong kidian ciangin, Laymemberte in Mission makaite kihello in Committee tuam hong nei uh hi. Mission makaite in Committee a-nei hun zong theihpih lo hi. Tua bang kalsuanna in SDA pawlpi kalsuanzia maan ahi ding hiam? SDA Working Poliicy B-a 10 10: 

(1) Conference a suah nuam Mission khat in Division pan a bawl Conference hih zawhna

      ettelna form pen kitung hiam en in Union Committee ah puak ding hi.

(2) Tua form pen Mission Committee in enpha in a lungkim leh, a thukimna uh Union ah 

     thusung ding hi.

Conference hih theih nadingin mimal khat peuh ih hanciam theih zong hi lo, Committee maimai khat peuh ih sep theih zong hi lo hi. Kalay-Tahan khuam pan hong piangtawm ahi Conference Planning Committee tungah SDA Working Policy in bangmah tavuan piakna nei lo hi. Bang hangin ei ZomiSDA mipil mitei mahmah te’n hih thu tawh hai lawh mawk ih hi hiam? Bang in hong khim hi mawk ding hiam? SDA organization-kipawlna in hong theihpihlo CPC cih committee ih neihna in amasa pen kisinkhiatna ahi hi. SDA pawlpi ki-ukna langpanna hi a, SDA Church Manual sungah [Pawlpi kitapna ding kipawlna, ahih kei leh pawlpi langpanna ding vaihawmna cihte ah kihelna, tua bang lungsim neih cintenna; Pawlpi’ thuneihna mang nuamlo-a nial teiteina, ahih kei leh pawlpi thukhun leh thukhenna zuih nop lohna, p. 161 (Tedim edition] palsatna hi.

 

General Conference of Seventh-day Adventists’ Vice-president, General Conference of Seventh-day Adventists Southern Asia-Pacific Division’ President Elder Albert C Gulfan in, Kai Za Dal kiangah “I have instructed you to disband this Committee because it is not authorized by the constituency of the Mission and not recognized by the Union” (March 15, 2004) ci hi. Kai Za Dal in bang hang makaite sawlna zui nuam lo hi ding hiam? Tua kipawlna bang hangin phiat nuam lo hi se ding hiam? Jesu um takpi ahih nak leh, Jesu hong sawlna tawh kizui in hong uk mangte tu a man ding hi. Pawlpi paizia a thei pen ding pa hi. Pawlpi sung aa makai panmun tuamtuam ah maa pang ngei pa hi.

Pawlpi thu nial-a sep lo ding thu khat sep teitei na pen langpan’na hi-a, pawlpi thukhun tawh kituak lo ahih manin pawlpi tawh a kikhen ding mah hi zaw hi. Pawlpi nin sak, buai sak hi. Pasian in zong vantung gam a buai sak Lucifer pen vanah om sak lo in, hong hawlkhia a hih leitungah hong kia suk hi. A dangte a thuzawh ding patau ahih manin koih nawn lo hi, ci in kamsangnu in hong tel hilh mahmah hi. Tua mah bangin Pawlpi hong langpan uh tak ciangin, kikho in kikho zo lo ahih ciangin pawlpi pua ah kikoih hi ta hi.

 

Kamsangnu hong hilh kikna ah: “Pasian phuh munkip pan taikhiat ding hi lo hi. Kipawlna thak khat ah lut ding hi lo hi; tua bang ih hih leh thumaan pan lampial ih hi hi” (2SM 390) ci hi. “Myanmar Adventist Conference” ci-a kipawlna thak hong bawl in, makai panmun hong kiguat tak ciangin, thuneu tawh a kibat hangin thuneuno na hi nawn lo in, pawlpi ki-ukna langpan na hong suak hi. Pawlpi thukhun sungah zong pawlpi i lutang ahi ding pa in khutngah na kipia Ordained Pastor hi ding cih hi-a, Kai Za Dal in kipawlna khat ah makaipi sep theihna thu ngah lo hi. Tua bang makai khat zat na zong langpan na hi in, hong makaih zia khempeuh pen, pawlpi khantoh nading ngimna tawh makaihna hong hi zaw lo in, pawlpi suksiat nading in makaihna hong tam zaw hi. Tua bang makai khat i zat mahmah zong lampialna pi khat mah hong suak hi.