"Union ah thupiang khat" cih lai thuk kikna

Dear it le ngaih pawlpimite

Anuai-a lai pen, zam lam ii hong khahkhiat attachment pen kong laak kik hi. Ama thei-a hong gelh hi lo-a, Kawlgam pan thu kipuak khat hong khahkhia kik ahih manin a lunglut pawl khat te ading nasep tam tuam sak hi. Ama hong khahkhiat teng color tuam tawh kong puahpha kik hi.

"Nunglam a, Union ah thupiang cihpen, a dik ahih lam mikim in ih theihsa mah bangin, tua ih laigelh ni mahmah inzong Deekte gam(South East) ah ih gen mah bangin a bawl uh ahi hi.

Tua ciang thukhat leuleu ah, Zomi te aadingin computer bangzah leh budget bangzah zanghiam thei khang, computer tampi leh internet kicing takin nei uh a, tua honpawi pen tu kha beikuan ciangin nei ding uh ahi hi. Sangtawh kisai ahih zenzen hangin, Education director pipa kihel lo ding hi se hi. Sum kem hi napin’ sum kemlo, a minpua dan aitam thei kahng, hitengah ka lawm deekte khatin banghangin khasum san’ciang, sumkempa kiang ki lalo a, Sawm-mee(Memory Tun) kiangah ong lasak se ale? Ci se se hi, nang la ngei na maw lawm? Ka cih leh, a mi bel ong gen dah ning ong civen kua hiam thei keng. A taktak in Ei Zogam ah sang aom hangin, a thu ah omlo dan aive, Ngaihsun thei leng ana mah hi.

Mission sungah om hileng bel theihhuai tampi omsa ing, Missionte bel lungduai thei sa mahmah ing, mi picing ciding hiam, thu ngaihsun ci ding hiam, ahih kei leh, bangmah theilo zaw, thu zalo zaw, khua mulo zaw, ahih kei leh, bangmah sem ngamlo, tungsiahte lau maw, ahih kei leh, deekte ong piakding gupna tan ngamlo maw, khasum iplah maw khat hi limlim in um pong ing. Mission ka hih loh mah kipaak ing cih hun bang omphial ei guai! A tunga dan milmel in om zong khat veivei ahoihzaw hiam thei keng e, thu theipian in Mission sungah omleng lah ih hehsuaksuak mai zel ding a cih huai zel mate. Sumnei sunsun, pilna nei sunsun ten lah, a thu in lah huhlo, a sum a neih venvan uh hangin Conference lah lutlo a, a Pupi Buldozer deekten lah huhlo thupi simlo aihteh biakinn beek, pawlpi vanbeek cihlah omlo hehpih huai cileng kikhial lo ding dan himai veh aw mate guai! Ih Zomi te leh ih upper Myanmar ih itman hi ei guai, Conference ih hizong, sem ziahziah thei beekin, Conference hilo a, Deekte lamah ombuangin, Zomi mipihte na hicih buang kei le uh ih cihna hi ei! Pasian in Mite muansangin A mahleh a mipihte mah thu masa ah akoih zodingin, ZomiSDA mimal khatciat thupha ongpia ta hen! Amen"

Hi banga "Union ah thupiang" cih thulu tawh lai nong gelh uh ciangin, eima lungsim toi zia kilatkhiat sakna hi zaw hi. A diak in ei Tedim kampau Adventist pawlpimite in ngaihsun pha diak ni.

(1) 2007 kum March kha bei lamin Upper Myanmar Mission zumpi omna Pyinoolwin khua ah MYUM bup kikhoppi kinei-a, ei Tedim mi bang zah ii pai hiam? Motor bangzah dim in Kawlpi pan nong ding suk uh hiam? Mawtaw 4 khawng bek hi. Tua zong Mission in lamsapna a lang (half) hong piak sak man leh, worker peuhmah pai lo phamawh cih thu om man in a kipai hi pan hi. Pawlpi mi nautaangte 75 zong pai lo hi. Khanglam te bangzah hong pai hiam? Meileng 5 bang kizangin a vekpi in 3000 val bang pha hi. Amau sum tek tawh hong pai uh hi. Pawlpi in bangmah piak sak lo hi.

1994 kum Upper Myanmar Adventist Seminary, Gyothonbin ah kibawl Diamond Jubilee lai in kuate tam pai zaw? Khanglamte mah tam kipai zaw hi.

2003 kum Thantaung, Bagu Division a kibawl kumzacin kikhop lai in ei Khamtung, Sagaing Division sung panin bang zah ih pai hiam? Pawlpi mi nautang te kipai lo hi. Workerte bek pai uh hi. Bang hang hi ding? Kha Siangtho nei lo ih hih man hi. Pasian ading ih sum le ih paaite a zang ngamlo mite ih hi hi. Kha lam thahat ung ih cih kankan hangin Karen te ii pha zo nai kei hi. Conference ih cih hangin pawlpi in hong kipiak sak le bek in a ut pawl ih hi hi. Eima neihsa piakkhiat ding ii ut kei-a, pawlpi sum a omsa zatkhiat ding, tua tung pan meetna ngah ding bek ii ut hi.

UMM huam sungah kibawl pawi te zong pai zolo ih hih leh, mun dang-a te bel genvet om kei mate. Tua lo ei Khamtung gam ah kibawl pawi te ah e? Tua zong deihzah ii pai zo kei hi. Lamsap hong kipiak sak hen la, motor peuh tawh hong kidawn leh, a khawnkhong ci-a a lian anew ii diang ngeeingaai hi. Zum huai lua sa ing.

Khanglam ah kihawhna zong baihzaw ahih manin, mun khat ah pawi om le kipai ngeei ngaai uh hi. Amau sum ciat tawh pai uh hi. Pawlpi in an bek pia uh hi. Tu-a na gengen uh South East kikhop zong, a paite amau aa-ciat tawh apai uh hi. MYUM ahi a, South East Mission pan ahi zongin huhna kipia lo hi. UMM sunga om sangte zong hong pai nop leh amau sum tawh pai theih hi lua hi hong ci uh hi. Eima kianga om pawite zong pai lo pen, mun gamla a te pai semsem ding ih hia?

(2) Southeast Adventist Seminary akipia computer [CPU 20] tungtang-a "Zomi te aa dingin computer bangzah leh budget bangzah zanghiam thei khang" (Zamlam) in hong ci hi. Hih CPU 20 [complete set hi lo lai] adingin MYUM in pia khat zong kibei/kipialo hi. Pastor Saw Cycrus Brown, Myanmar church pastor, BKK in Ekhamai Adventist Academy, Bangkok ah amau zat lo, a deihlo a koihte nget sak hi. Amau sangin amau fund tawh [Monitor 20] lei a, tua tawh anei thei hi pan hi.

SEAS adingin second hand CPU 20 akipia pen dei ngawh ta zenzen? Ei'n bang ding-a haza pong ih hiam? Eimi tampi tak gam dangah ki-om ta a, computer second hand ciang beek lei na ding bangzah ii pia khin hiam? Anderson Adventist Seminary, Upper Myanmar Adventist Seminary leh Phydawta Adventist Seminary pan Grade 10 le Grade 12 a zo teng in computer khat tek pia le hang, tua sang teng ah computer 30 val bang om ta lo dia? Ih khankhiatna sang puah ding zong kingaihsun zo lo lai a, Conference din sawm cih mawk mawk zong "NGAIHSUN THEI LENG ANA MAH HI" zaw hi.

(3) Hi SEAS computer kipiakna tawh kisai in, "Sang tawh kisai ahih zenzen hangin, Education director pipa kihel lo ding hi" nong cih uh pen, patauh huai mawk ei. Deihsakna hi ci-a ngaihsun leng hoih na ven, na hi lo mawk, hong suktuahna na hi gige! Computer secondhand kipia 20 honpawi a Union makai te vapai tangtang ding cih zong hong naupang suak kik lua ve aw. Yangon Adventist Seminary ading a, sangnaupang luite piak complete set 10 te zong honna pawi bawl se kei ve e. Tu'n na zangthei mahmah lel uh. Tua zong budget bangzah kizang hiam ii ci nuam dia?

(4) "Khasum san ciang, sumkempa kiang kilalo a, Sawm-mee(Memory Tun) [sic] kiangah hong lasak" cih zong patauh huai leuleu ei. Yangon ka tun kum nga cing ding hi ta, kha sum ka san ciangin Memory Tun kiang pan sang ngei nai lo hi ing. Bek tham lo-a Treasurer pipa Nang Do Dal kiang pan zong kisang ngei lo a, MYUM Cashierte kiang pan bek in kisang hi. Kha sum piak khiat pen Assistant Treasurer pa nasep hi zaw lai hi. Zum paizia theih pih nai khol lo hi kha in um ing. Bangmah theilo pi keimah a thei pen ahi ding ki-ut pong hi ei. Tua zong eimite nat-tunnatna khat hi gige hi.

(5) Zomite ka it, Upper Myanmar ka it a cici te’n Upper Myanmar Mission sung-a nasepna ding bangzah tawh panpih khin….? Tu ni ciang ciang hong thei pih nai kei veng…Mission ci kei ni, Conference ah e leh? College le Tan Sawm sang nei pong ii hih cianga, tua te ading Computer second hand ahi lo, a thak sitset bangzah pia khin? Second hand beek e leh? Kipia nai kei ei…It takpi ci thei ding maw le? Tua te ading hong vaihawm sak masa photphot un la, tua khit ciangin Mission sunga om sangte vai hong kuppih pan zaw un maw.

(6) Hih banga Union-a thupiangte ci-a mipi theih ding a laigelh nuam in Mikaang lai in hong gelh mai vevua, ii Deekte mahmah in hong sim thei photphot le hoi ding hi. Amau kiangah lah kam kiphen kik kik manlo in a deihna sukha kei ve aw.

UMM: Conference Tangthu suutna

“1999 kum in UMM President Kham Khen Pau in MYUM Treasurer Memory Tun kumpi zumah khia a, hih pen SDA pawlpi sungah kumpi zum kitun masa pen thu ahi hi” ci in August 27, 2007 ni in sanggampa Zomungpi in hong gelh hi. Kei muhna ah, tua hun panin Conference kipan khin ta hi.

Nov. 20, 2002: Meeting No 01/2002 [Pa Thuk Kim, Pa Khual Za Nang, Pa Thang Lian Khup, Pa Thang Za Pau, Pa Cin Ngaih Mung, Pa Cin Khan Thang, Pa Kam Khan Mung] te in Conference Planning Committee masa pen nei uh hi. A khensatna ah, [28/11/2002] nitak in Tahan B biakinn ah meeting nei kik ding cih hi.

Nov. 28, 2002: Meeting No 02/2002 Conference Planning Committee nei uh a, Thukhensatna

01 – Conference ding kulta hi, cih khensat

02 – Sumpite tuam khol pah ding, a hun ciangin Division ah puak ding

03 – Panmun len ding kiseh hi. Chairman Kai Za Dal, Secretary Cin Ngaih Mung, Treasurer Thang Lian Khup

Jan. 7, 2003: CPC Chairman Kai Za Dal in Southern Asia-Pacific Division President Bocala kiangah conference a dinkhiatna officially in thupuakna lai gelh hi.

March 6, 2003: Bocala in “the local church should not hold the tithe….does not follow Church Manual is doing an act of separating from the SDA church. If there is that feeling that they want to do what they want and not following the Church Manual and the church policy, that disqualifies them to be conference” ci-in lai hong thuk kik hi. [Khuatual pawlpi in sawma khat khaktan thei lo hi….tua bang in Church Manual a zuih kei leh SDA pawlpi tawh kikhen dinga a sem ahi hi. Amau ut bang bek-a sem nuam in Church Manual a zuihnop kei leh, conferece dingin picing lo hi.]

April 4, 2003: Meeting No. 06/03 Voted 06/03 tawh worker nasem cial ding khen sat uh hi.

April 23, 2003: SSD President Bocala in lai hong khak: “No mission can be organized without the approval of the Union and also confirmed by the Division –Union theihpihna leh Division kipsakna om lo-in mission khat kiphuankhia thei lo hi. To organize a conference is even more rigid – conference khat kiphuatkhiat ding pen tua sang thupi zaw lai hi….Not fighting against the Mission and the Union – Mission leh Union langdo ding hi lo hi. If they don’t follow the policy of the church, they become offshoot – Pawlpi policy a zuih kei leh alampial uh ahi hi….If any one will organize any institution, union, not sanctioned by higher organization, and not respecting the policy of the world church, that is an off shoot. That is illegal. The Division and the General Conference will not recognize that – Sang, Union khat peuh pen tungsiahte theihpihna leh Leitungbup pawlpi policy thusim lo-a a phuatkhiat uh leh, tua in lampialna hi. Amaan kipawlna hi lo hi. Division leh GC in kipsak lo ding hi.”

April 28, 2003: Kai Za Dal in SSD lai-atpi Dr Ng kiangah lai khak a, conference suah nading kisapna thu 12 gelh suk hi. Workerte in zawhthawh thu tawh nasem; Thang Siang, Gin Lian Pau, leh Kham Khen Pau te a hun cing nai lopi in kiteelna panmun panin hong hepkhiat sak; sangte sumpiak kikimlo; ATI leh MMCC hong do; cih leh conference hong langdo hi cih te hi.

Hih ni mahin Pension lasa Pastor Rualchhinna in sumpite tuamkoih loh nading leh MISSION tawh kop a conference nget nading in lai tawh tha hong pia hi.

April 29, 2003: SSD Secretary Dr Ng Pyinoolwin ah hong zin a, CPC upa 13 te tawh kimu hi.

May 4, 2003: SSD Secretary Dr Ng in Pyinoolwin hong zin sunga a muhkhiat thute thupi 3 hong gelh khia hi.

(i) ATI thu, (ii) Mission/conference thu, (iii) Sanglam thu cih te hi.

May 23, 2003: CPC Chairman Kai Za Dal in Myanmar Union Mission President pa kiangah UMM makaite in conference deihte hong langdo hi, ci-in khia hi. Kikhiakna lai himhim a pusuah masa penpen ahi hi. Conference kici te in khiakna lai gelh masa pen cih na hi.

May 27, 2003: Pa Gin Sian Mung makai in gamdang a tungsa mi 49 in SSD President Bocala kiangah Conference hih theih nading in laigelh-a thupuak hi.

June 5, 2003: Kai Za Dal, CPC Chairman in SSD lai-atpi Dr Ng kiangah, UMM makaite in ATI langdo, UMM Chairman Kenneth in ama minampihte bek thupi sak hi cih mawhsakna, Kenneth in UMM EC member 2 dokkhia in laymember 2 a guanding guang nai lo hi cih mawhsakna leh khiakna lai gelh leuleu hi. Mission makaite a khiakna a nihveina hi.

June 5, 2003: SSD Lai-atpi Dr Ng in Pr. Kenneth lai khak hi. Tua sungah “[1] There should be NO such thing as Conference Planning Committee – Conference Planning Committee cih bang om lo ding hi. [2] UMM EC ah layte 2 guang thei mah hi. [3] Ahi zongin EC sungah layte 25 % sang tamzaw lo ding cih policy om hi. UMM in mission hi lai ahih manin, nih behlap ding hi thei lo hi.”

August 1, 2003: CPC Chairman pa laigelhna ah, SSD President Gulfan tawh akimuhna thu te hi a, a thupi zaw deuh pawl khat en le hang (8) Tithe leh sumpi zong nakpi takin kikum ung. Ama hong cih bangin hong kikal suan pih ding hi. Kuamah in local church ah kem, zang lo in Committee ah hong puak un” ci hi. SSD president in na sumpite mission ah na puak masa un acih laitak in, Kai Za Dal in committee ah hong puak un, ci kik kik hi. A lungtang khauh ziate kimu thei, kei cih a maan pen hi cih na leh, a theilo te khem ding hong kipatna hi.

August 8, 2003: General meeting a thumveina ah a khensatna te Kam Khan Mung in report piakna ah:

Voted 37/03 Dr Ng in Maymyo hong pai lai in Section EC worker 2 khiam dinga, lay member 2 behlap ding a cih pen, lay pan in Khual Za Nang leh Khen Do Pau kitel hi. [June 5, 2003 a Dr Ng lai na enkik un. Behlap ding a ci hiam?] Tungsiah thuneihte sawlna bang zui lo in, ama ut bang in na hong sem sem ahih na hong kilang mahmah zo hi.

Oct. 1, 2003: Pau Za Khan laikhakna ah, paizia te maan a sak lohna hong genkhia, “1992 kum kiteel in zong ei deih bang piang ih sak loh the, tutphah awn lo ding cih kikupna om in, keimah ut lo ing” ci hi.

[Dec. 13-19 1991 a Union session khit, Thang Siangh in President hong ngah loh tak ciangin a hawm khiat lai zong tu in keem lai ing. April 4, 1992 ni tawh Former president cih zaa gelh in Thang Siangh in conference ah kalsuan nading in UMM makai te kiangah a ngetna lai zong kem ing. Far Eastern Division pana Associate Secretary ahi Clinton L Shankel in UMM president Pr Sandy Dee kiangah June 18, 1992 ni tawh a laikhakna ah, “Your finances are lessened…If your finances are not strong, then becoming a conference puts an additional financial burden upon you which will make it even more difficult for you to operate. We do not want the program in Myanmar to suffer because of a conference status. Hopefully this will in part answer your request to Elder Bullock” ci hi.

Sia Kham Khan Pau in a laihawmna khat ah, “1992 April kha in UMM EC vote la in remind leuleu napi union te’n na forward lo hi. A deihte’s sem napi, a khaktante hangin ma kisawnlo hi” ci in gelh hi. FED Associate Secretary pa lai thuk-kik koi ah koih hiam? Makaite mawhsak nading bek ih theih hi zen ding hi.

Dec. 6, 2003: SSD President Gulfan in Kai Za Dal leh Khual Za Nang tungah laikhakna:

“No single Mission in Myanmar is ready for conference status – Kawlgam sunga mission khat beek in zong conference dinmun a ding kiging nai lo hi. If all will rally behind the duly appointed leadership of the Mission and the Union, achieving Conference status would not be a problem – ih vekpi in a kiteel sa makaite ahi Mission leh Union makaite tawh kithuhual nak leh, conference hih na ding haksa lo ding hi.”

Jan. 1, 2004: UMM EC in CPC nasepnate in pawlpi buaisak nading bek ahih manin, CPC in lampial hi cih khensat (UMM 2003-90) a, ni (90) sung ah hong kikhel un, tua kei leh kizopna kitat ta cih in ngaihsun ding hi, cih thu kiza sak hi. Conference deih mite a disband in na ngaihsun uh hi. Tua bang hi lo zaw a, CPC kipawlna kisanglo hi cihna hi zaw hi. CPC tawh kizop loh ding cihna hi. CPC leh Adventist Church kisai lo hi cihna hi.

Jan. 15, 2004: UMM EC in CPC tungah, CPC na phiat kik kei uh leh kizopna kitatsak ding hi cih thuhilhna lai hong thuk kik a, UMM EC in nong niciam ni ma ngeingei in ko deihna te nong zuih zawh ding leh zuih zawh lo ding hong za sak un, ni (90) hun hong pia ung, ci hi. Kha mite gamtatna hiam? Tua banga thu a suahsak ciangin, amau ii CPC in bangci bang kipawlna hiam cih hong kilang sak sak hi zaw hi.

Jan. 16, 2004: CPC/ pan a min hong khel kik a, Upper Myanmar Conference UMC hong ci hi. A thu khensatnate a nuai a bang hi:

12/04 Zum nei ding, signboard suang ding khen sat hi.

14/04 Circle leader teel uh, UMC makai thak/luite teel kik uh hi.

March 15, 2004: SSD President Gulfan laikhakna ah, “Remit all your tithe and offering to the duly recognized mission organization = sawma khat leh sumpi khempeuh mission kipawlna ah puak-kik un. Do not hire workers under yor CPC – CPC kipawlna tawh worker na cial kei un. I have instructed you (Kai Za Dal) to disband this committee CPC – na committee uh phiat dingin thu kong pia khin zo hi.

April 19, 2004: UMM EC in khensatna (UMM 2004-017) tawh Upper Myanmar Conference UMC pen thuneihna ngah a kiphuankhia kipawlna hi lo hi, tua kipawlna ih sep khempeuh SDA pawlpi tawh kisai lo hi cih theihsakna lai pen Religious Affairs’ Director ciang dong kipia in kihawmkhia hi. Khiakna lai hi lo hi. Hih pen kikhia hi lo hi. Buaina khat peuh om leh pawlpi kihuut nadinga kiginkholhna hi zaw hi.

Tua ni mahin UMC sungah kihel pawlpi mite koici bangin khalhna nei ding cih khensatna (UMM 2004-018) kinei a, a nuai a bang hi:

(1) UMC kipawlna tawh kizom Workerte nasep pan khawl sak ding,

(2) UMC kipawlna sungah kihel pawlpi mite Church Manual bangin khalhna pia ding,

(3) Local pawlpi in a sep theih lohnate ah, pawlpimite min sazian leh a thu om bang ngah

dinga, Church Manual om bangin kisem ding, cih thu hi.

April 21, 2004: Kai Za Dal in UMM EC khensatnate anuai-a bangin thuk kik hi:

(1) Na khensatnate pawlpi thukhun tawh kituak lo ahih manin ka nial uh hi.

(2) CPC pen nasepnate maan lo hi cih hong lakkhia dinga kiphuankhia pak hi-a, tu ni dongin tazavuan kiphuatna om nai lo hi. [CPC in khensatna tampi nei a, makai zong kiguan khin a, kiphuan taktak nai kei cih zong bang deihna hiam?] cih thu tawh Religious Affairs’ Director ciang dongmah laipia kik uh hi.

May 13, 2004: Chanthagyi pawlpi in UMM SDA sungah kip lai hi ung, cih letmat thukna nei uh [Zam Sian Thang, Cin Do Lang, Thang Lian Nang, Thual Lian Dal] te in letmat thuh uh hi.

May 26, 2004: Chanthagyi upa Thual Lian Dal in CPC/UMC palai hihna pan kakhawl hi cihna lai hong pia hi.

June 3, 2004: MYUM EC in Upper Myanmar Conference pen SDA pawlpi kimakaihna policy tawh kituak lo ahih manin kipom sak lo hi ci in (MYUM EC 2004-090) tawh khensat uh hi.

June 15, 2004: UMC Chairman Kai Za Dal in Neng Khan Suan tungah a laikhakna thute: UMC pen tazavuan a kiphuankhia sa hi, ci in lai mai 3 dimin khak kik hi. [April kha 21 ni in Kumpi zumah, tazavuan nai lo hi ci-a, tu ciangin tazavuan kiphuan hi ci leuleu hi, bang deihna hiam?]

June 25, 2004: Sia Neng Khan Suan in Khuahausa te kiangah, Tonzang ah SDA pawlpi pan thuneihna kipia lo mi pawlkhat in nasem ahih manin, buaina khat peuh hong pian khak leh, SDA pawlpi tawh kisai lo hi cihna lai pia hi.

June 28, 2004: UMC Chairman Kai Za Dal in “UMC pen tazavuan a kiphuankhia kipawlna khat hi,” “UMM te hong mawhsakna te maanlo hi” cihna lai pen Religious Affairs’ Director, Yangon ah puak kik hi.

August 29, 2004: Lezang khua panin UMC kipawlna sungah a lut teng in SDA biakinn zang nuam hi ung, hun hong khen sak un ci in, Tedim Township Religious Affairs zum ah ngetna lai na phah uh hi. Kumpi thu neite khensat dinga kikhia masa pen lai ahi hi. Hih buaina thu-ah UMM zumpite in hunlap in kidelh man lo ahih manin, biakinn khat ah nihvei hunzat nadingin kumpi lampanin thupiakna hong nei sak uh hi. Kua’n kumpi thukhenna ngen masa zaw hiam? Mission ten khia masa hiam? Kai Za Dal pawlte hiam?

Sept. 9, 2004: Tonzang UMC Pawl pan Pa Kap Do Thang in “Kai Khan Khual, Min Lwin, Muller Kyaw, Memory Tun, Suak Khaw Ngin leh adang pawlpi nasem (12) te zong, Church Manual laimail 187 na tawh kizui-in pawlpi pua ah hong kikoih khin hi” cihna lai hong khak hi.

Sept 23, 2004: UMM ah Mission leh Conference buaina hangin SSD President AC Gulfan, Kalaymyo ah hong zin a, pawlpi mi ahi thei zah kikaikhawm in thu kingai tek hi. Zingan ne lo liangin ei thusunte hong ngai hi. Nupi khat in Tapungte tawh kipawl nuam kei ung ci in hong gen khia hi.

Oct. 8, 2004: Lezang pawlpi te thu teng azak ciangin, Tonzang UMC te in zong Township Religious Affairs pa kiangah ngetna pia uh, UMM zum panin Pr Kai Khan Khual in delh to a, a thu hong zo uh hi. Pawlpi buai lel ahih manin UMM zumpi panin biakinn khalh dingin (UMM 2004-048) tawh thupia hi.

Oct. 13, 2004: UMM panin pawlpi sungah UMC te in buaisak ahihmanin hong hepkhiat sak nading in Religious Affairs’ Director-Generalpa kiangah lai pia hi.

Oct. 17, 2004: UMC Chairman in Khampat khua-ah Galkap thukan lam makai pa kiangah Sawbua pawlpi pen pawlpimite neihsa hi cih thu tawh thupiang te peuhmah hausate in hong lawnsak lohna ding thupiakna lai khat na pia hi.

Oct. 21, 2004: MYUM EC in khensatna (2004-090) tawh UMC makaite a hi Kai Za Dal, Thang Za Pau, Sian Cin Zam, Kham Khen Pau, Thang Za Pau (Pinlon), Kam Khan Mung, Thang Lian Khup, Khen Do Pau, Cin Deih Khup, Zawn Lung, Zuam Kham, Nang Cin Hang, Khual Za Nang, Dai Khan Mang, Hual Lian Thang, Bawi Sum, Nang Suan Gin, Thang Do Pau, Thang Za Kham, Kap Do Thang te SDA pawlpi pan in a min paaikhia hi.

Oct. 25, 2004: UMM zumpanin Mayan hausate kiangah UMC/MAC vai zaksakna lai kipia hi. Kikhia hi lo hi.

Oct. 29, 2004: Sawbua pawlpi buai mahmah ahih manin MYUM panin hausate kiangah thuzaksak na khat kinei hi. Kikhia hi lo hi. Buaina om vet lo-a pusuah leh hoih ding pen tua bang lah hi thei lo ahih ciangin, ei mimal in kisep theih pen hausate kiangah zaksak ding longal bang mah om lo hi.

Nov. 19, 2004: Thalmual UMC te in zong Lezang UMC te paizia mah zui-in Tedim khua biakna lam makai kumpi zum ah hong tun a, UMM zumpi pan Pr Kai Khan Khual leh Pr Suak Khaw Ngin in ka del uh a, kumpi zum panin Thalmual SDA baikinn pen Mission te in kem hen, UMC te zong suakta takin kikhawm lel uh hen, cih lai hong pia hi.

Nov. 20, 2004: UMM pan Pr Suak Khaw Ngin in a kisawlna bangin Thalmual SDA pawlpi sung ah a sepna te kumpi theihpih dingin Tedim Religious Affairs makai pa kiangah lai pia kik hi.

Dec. 13, 2004: UMM in Special Power piakna tawh kizui-in Pr Lian Khan Dal, Pr Malsawma, leh Pr Gin Do Pau te in Kalay Township Religious Affairs Director pa kiangah a nuai-a bangin lain a phah uh hi: (1) UMC te in Pa Cin Khaw Pau kiangpan Pinlon biakinn tawhtang zawhthawhthu tawh la-a Kham Zam Thang kiangah ap uh hi. Tua bek thamlo in Telephone khau zong hong sat tan sak hi. Tua manin biakinn kongkhak tawmvei sung khak dingin ka na khensat uh hi” cih thu za sak hi.

Dec. 15, 2004: UMC makai Kai Za Dal in Kalay Township Administrator pa kiangah a laiphahna tawh kizui in biakinn hun nih zat ding phalsakna lai hong suak hi.

Dec. 28, 2004: ni tawh Pinlon hausa te in Pinlon SDA biakinn hun nih a khenin zang ding hi cih na thu UMC te ngetna pen hong phalsak a, thu hong pia hi. Hih bangin kumpi thuneite kiang pan biakinn hun nih kikhop nadingin thu hong ngah masa pen Kai Za Dal pawlte hi. Kumpite thukhenna kua in ngen masa hiam?

Jan. 3, 2005: UMC Chairman Kai Za Dal in UMC dinkhiatna thu a hilhcianna in Kumpizum Religious Affairs Director-General (Yangon) ah laimai (11) tawh lai pia hi.

Jan. 25, 2005: Pr Suak Khaw Ngin in Lezang SDA pawlpi sung pan a kihemkhia teng min saziante Tedim biakna zum makaipa tungah zaksakna nei kik hi.

Hih ni mah in, Kawlpi kiim ah zong buai den a, biakinn hun zat hawm na ding ngetna UMC te in Mahzahkah ah ngen den ahih manin, UMM zumpan in 3 vei bang Pr Kai Khan Khual tawh ka na delh uh hi. Pinlon biakinn pen hun nih zat dingin kumpi zumpan in thupiakna UMC in hong ngah uh hi. Kua in zum tun masa zaw hiam cih, ngaihsun thei kim ding in ka um hi. Tua hangmah in Kalaymyo Township Administrator pa kiangah (Dec. 15, 2004)ni-a hong thupiak te etkik nading lai ka gelh kik hi.

Feb 6, 2005: Kumpi ulianlam panin biakinn hun nih vei zat ding khensatna hong piak sak takciangin, buaina tuamtuam hong om pah a, tua manin Kalay-Pinlon biakinn vantawh kisai Kalay Township Administrator pa kiangah zaksakna lai UMM pan kipia hi.

Feb. 8, 2005: Pum Za Lian, Gopi, Tual Khan Mang, Thang Ngaih Pau, leh Dongh Za Hau te MMCC ah phalna om lopi in lut hi ci-in UMC in Hausa zum ah hong khia leuleu hi.

Feb. 9, 2005: CPC/UMC/MAC kipawlna pen a maanlo kipawlna hi ci-a hong tangko sak nadingin Kalay Township Chairman pa kiangah ngetna lai, Pr Suak Khaw Ngin in pia hi. [Jan. 6, 2008 ni in vung vung in “Pr Suak himself submitted a written request to township and district council of Tedim, Kalay, Tamu to close down Bible School” ci-in hong gelhkhia hi. Hih ni-a kipia lai sungah vungvung cih bang thu om lo hi. Na copy kep pen uh enpha kik zaw un.

Feb. 18, 2005: Sagaing Division Religious Affairs zum panin Deputy Director Myint Than in UMM President Min Lwin kiangah [UMC- Kalay te in 3/1/2005) lai hong khiakna tawh kisai nong phisian nading uh thu kong pia uh hi cihna lai kingah hi. Kai Za Dal pawlte in hong kha ahih manin UMM panin kiphisian kik hi.

March 9, 2005: UMC chairman Kai Za Dal in Sagaing Division Religious Affairs Head pa tungah conference vai thupuakna nei hi.

May 15, 2005: Religious Affairs zum panin bangmah sepsakna hong neih nai loh ciangin, UMM makaite in, khat vei lai gelh kik leuleu hi.

May 16, 2005: Yanggophai SDA biakinn zong mission in tawhkhalh dinga kikhensat a, ahi zongin UMC te lungkimlo ahih manin hih ni in, Tamu Township Administrator pa tungah hong khia hi. UMM zumpi panin keimah Pr Suak Khaw Ngin in ka delh to hi. Ahi zongin Yanggophai pen Mission ah kuamah om lo ahih manin biakinn leh mission inn te kikemcing zo lo hi.

June 10, 2005: UMC te hong khiakna 3/1/2005 zong kizo kik khin hi napi, tu ni ciang dong sepsakna bangmah om nai lo ahih manin, SPDC zumpi ah thusunna kinei kik hi.

July 2005: July 2005 kha adinga kihawmkhia ZANGKONG Awging butuamna cover ah hih bangin pawlpi dinkhiatna tangko uh hi. “MAC tangdinta: Kawlgam ah 1902 kumin SDA upna hong kipuak a, 1919 Kum ciangin Kawlgam ah pawlpi hong phut in, Zogam ah 1954 kum ciangin Mission hong phut uh hi. Thu um mi kitam semsem ahih manin Zogam, Kachin state le Shan state a thu um pawlkhat in gamdang pan huhna la nawn lo in April 2005 a kipanin Myanmar Adventist Conference min tawh tangdin ta uh hi.”

Oct. 30, 2005: UMC Chairman Kai Za Dal in Religious Affairs’ Director pa tungah (Jan 3, 2005) ni tawh kong khak lai tawh kisai in Mission te hong buaisaknate nong kham sak na ding uh kong thum hi cihna lai pia hi. Tua sungah UMC pen Myanmar Biblical Christian Fellowship pana Registration No 1617 tawh phalna ngah a kiphuankhia hi ung ci hi.

Oct. 30, 2005: MAC in Religious Affairs’ Director tungah Mission maan lohna laipi khat puak leuleu hi.

Nov. 11, 2005: MAC in SPDC zumpi aa Office Administrator pa tungah Mission khialhna thu laipi khat puak leuleu hi.

Nov. 21, 2005: Kai Za Dal in Pr Muller Kyaw khialhna thumna (Oct. 30, 2005) lai SPDC zumpi ah puak hi. (Lian_pi@sailormoon in Jahn 21, 2008) ni tawh agelh sung pan ka lak hi.

Jan 18, 2006: Upper Myanmar Mission constituency meeting, Pyinoolwin ah kinei a, SSD panin President Alberto Gulfan hong om in, UMC/MAC thu nakpi takin kikupna kinei a, a tawpna ah MBCF ih Registration Number 1617 tawh ding hi ung cihna lai a muh tak ciangin Disband dingin kikhensat hi.

Feb. 9, 2006: Pinlon biakin hun hong khen sak pen pan buaina piang toto ahih manin SDA pawlpi lah lungkim lo, Conference kici Kai Za Dal pawl te lah lungkim lo ahih manin, zum kitun tuaktuak a, Township Administrator pa in a thak in thupiakna hong nei pha kik hi.

May 21, 2006: Myanmar Union Conference min tawh Kai Za Dal in Kalay Township Administrator pa kiangah leh Religious Affairs makaipa kiangah laikhia hi. A thu panin, (1) Moe Khaing (a) Ngo Khaw Nang leh alawmte in Pangpi pawlpi hong buaisak loh nading, (2) Pangpi biakinn zong hun nih khenin kikhop theih nading, (3) Sawbua biakinn zong a ngeina banga zatsuak theih nading cih thulupi hi. (8) na ah Myanmar Union Mission pen gamsung buaisakna, sumbawlna lamah kihel ahih manin Mission tungah upna ka nei nawn kei uh hi. Amau tawh kizop ding zong ka ngaihsun vet kei uh hi. Tua ahih manin Paangpi SDA biakinn ah hun nih kikhop nading in hong bawl sak un, nong bawl sak zo kei uh le zong Pinlon 11 a SDA biakinn ah zong Mission te kikhop ding nong khaktan sak na ding leh Sawbua conference te hong ngetna zong nong sep sak nadingin thu kong sung uh hi.

Jan. 2007: Chanthagyi Biakinn pulpit tungah Pa Zam Sian Thang leh alawmte nih in pawlpi kem siapa Lalhmunsiama’ gawlmeek uh ahih manin, zum kitun uh hi. Conference vai tawh khutlum kitu masa penpen na ahi hi. Tua tawh kizom in Chanthagyi conference kici te in biakinn ah hun nih kikhen a zat ding ngetna lai kumpi zumah na pia uh hi.

March 26, 2007: UMM thupiakna tawh kizui-in Ngo Khaw Nang in Kai Za Dal leh Kham Khen Pau te Kawlpi Thukhen zumah khia hi.

May 10, 2007: UMM in Mandalay Division thukhen zumpi ah MAC in Seventh-day Adventist leh a kisaipih van, min, logo khat pepeuh a zat loh nading in khaktan nading in ngetna lai phah hi.

July 13, 2007: Chanthagyi Thang Khan Dal [kum 57, NRC ka ciamteh kei ci, U Song Za tapa] in Sia Lalhmunsiama leh a lawmte 3 pen biakinn tawh hong khalhsak hi, ci-in Kalay Township thukhen zumah khia hi.

Nov. 13, 2007: UMC/MAC president Kai Za Dal [kum 54, TM 037695, U Thawng Do tapa] in Gin Lam Cin, Pum Za Lian, Thang Ngaih Pau, Dai Go Pau, Cin Khaw Pau in ka biakinn van uh hong guksak hi ci-in Kalay Township Court ah khia hi.

Anuai-a teng pen, Kai Za Dal in Mandalay Division court ah a witnesses dinga a lakkhiat hi a, Min a kigelh masa te pen a khia lamte cihna hi.

(1) June 29, 2007: Crime case 2474/2007 (Kai Za Dal in/ Pum Za Lian leh 4 te) Law No. (447) tawh khia

(2) June 29, 2007: Crime case 2475/2007 (Kam Khan Mung in/ Gin Do Pau leh 5 te) Law No. 403 tawh

sangvan gu in khia

(3) April 11, 2007: Crime case 1332/ 2007 (Langh Khan Suan in/ Gin Do Pau leh 12 te) Law No. 296 tawh khia

(4) April 11, 2007: Crime case 1331/2007 (Thang Khan Dal in/ Moe Khaing leh 4 te) Law No. 341 tawh khia

(5) March 26, 2007: Crime case 926/2007 (Moe Khaing in/Kai Za Dal leh 2 te) Law No. 465/469 tawh khia

(6) April 7, 2007: Crime case 1127/ 2007 (Moe Khaing in/ Kai Za Dal leh 8 te) Law No. 447/403/506 tawh khia

(7) (Ani kicianlo) Gin Do Pau in/ Kai Za Dal leh mi 8, Crime case 1921/2007 tawh khia

(8) Sept. 4-5, 2007: Kham Khen Pau in/ Muller Kyaw leh Min Lwin Civil case registered No 12/2007 tawh

Division Court, Monyaw ah Min Lwin in Mandalay a akhiakna thuk kik in, khia leuleu hi.

Dec. 18, 2007: Kham Khen Pau leh Kai Za Dal in Mission nasemte nih pen thukante a kineih hi, ci in Kalay District Police office ah hong khia uha, thusitna thuak hi.

Jan. 20, 2008: UMC Makai Kham khen Pau in Kalay District Police Station ah, Mission workerte nih thukante kineih hi cih a akhiat na teng manglai in hong teikhia kik a, SSD President tungah hongkhia kik hi.

January 2008 sungin hih thu mah tawh Khampat Police Station ah khiak hong sawm kik lai, cih thu kiza hi.

February 2008: Kai Za Dal leh Kham Khen Pau in Pr. Ngo Khaw Nang leh a lawmpa pen galkap thukan zuau in kinei hi ci-a Tamu court ah hong khia kik leuleu hi.

February 12: Hih ni in Kai Za Dal leh Gin Khan Sing te in migilo galkap gina lote cial in Pr Ngo Khaw Nang pyianpisuai (man) sak in, hong that ding hi ung, ci in a awmpuan pan len in thah sawm hi. Buaina pen biakna thu bek hong hi nawn lo in, mimal in kimuhdahna hong nei ta uh cihna kithei ta hi. Zuauthu tawh khiak leh thazawh suangin sep mang dingin hong ngimta cih kimu thei hi. Biakna mi, khami hi le-uh bel tua ci lo mah ding hi ven!

February 2008: Pr Ngo Khaw Nang in thu hi lo pi tawh Police te kiangah nih vei bang hong khia khin pa Kyaw Sint kici khat pen “Bu tuh in kineih hi”, ci-a maan khat tawh Tamu court ah khia kik hi. Tua maan pen Internet email sungah hong suak khin zo hi.

May 23, 2008: Kham Khen Pau leh Kai Za Dal te in Tamu court ah hong khiatna “Bu tuh vai” pen Mission lampan kizo siang hi.

23 Dec 2009: Kai Za Dal leh Kham Khen Pau te SDA Logo hong zatsakna hangin kha thum thong kia uh hi.

12 March 2010: Kai Za Dal leh Kham Khen Pau te kha thum thong kiatna pan hong pusuak kik hi.